ᓈᓚᒃᑎᓂᑦ ᓂᕈᐊᖕᓂᖅ
ᓈᓚᒃᑎᓂᑦ ᓂᕈᐊᖕᓂᖅ (ᑕᐃᔭᐅᖕᒥᔪᑦ ᓈᓚᒃᑎᑦ) ᐃᖅᑲᖅᑐᐃᕕᖕᒥᐅᕙᒃᐳᖅ, ᓄᓇᓖᑦ ᐱᙳᐊᕐᕕᐊᓂᑦ ᐃᒡᓗᔪᒡᓘᓐᓃᑦ ᑎᑎᕋᖅᑕᐅᓯᒪᔪᖅ ᓈᓚᒃᑎᐅᓂᖕᒧᑦ ᖃᐃᖁᔭᐅᔾᔪᑎᖕᓂᑦ.
ᓇᒃᓴᕆᐊᓖᑦ:
- ᖁᓪᓕᖅᐹᖅ ᖃᐃᖁᔭᐅᔾᔪᑎᕕᑦ ᑎᑎᖅᑲᖓᓂᑦ
- ᓇᓗᓇᐃᒃᑯᑕᒥᑦ ᐊᔾᔨᓕᖕᒥᑦ
ᖃᓄᐃᓕᐅᒐᒃᓴᑦ:
- ᓇᓗᓇᐃᖅᑕᐅᓯᒪᔪᒧᑦ ᖃᐃᖁᔭᐅᔾᔪᑎᖕᓂᑦ ᐅᐸᒡᓗᑎᑦ − ᐃᖏᕐᕋᔾᔪᑎᑎ ᓲᕐᓗ ᑖᒃᓯᕈᑏᑦ ᐸᓯᒃᑰᕈᑏᓪᓘᓐᓃᑦ ᐅᑎᕐᑎᑕᐅᔾᔮᙱᑦᑐᑦ
- ᐅᐸᒋᐊᓕᖕᓄᐊᕈᕕᑦ ᖃᐃᖁᔭᐅᔾᔪᑎᒃᑯᑦ, ᒪᓕᒡᓗᒋᑦ ᓇᒧᙵᐅᖁᔨᔪᑦ/ᑎᑎᖅᑲᑦ ᐅᐸᒋᐊᓕᖕᓄᑦ ᐊᑎᓕᐅᕆᐊᖅᑐᕐᓗᑎᑦ ᐃᖅᑲᖅᑐᐃᕕᑦ ᐸᓖᓯᙳᐊᖓᓐᓄᑦ
- ᐸᓖᓯᙳᐊᖅ ᓇᓗᓇᐃᔭᐃᓂᐊᖅᐳᖅ ᓇᒧᙵᐅᔭᕆᐊᖃᖕᒪᖔᑦ ᖃᓄᐃᓕᐅᕆᐊᖃᖕᒪᖔᓪᓗ
- ᓂᕈᐊᖅᐸᓪᓕᐊᓇᔭᖅᑐᑦ ᐃᖅᑲᖅᑐᐃᕕᖕᒥᑦ, ᓄᓇᓖᑦ ᐱᙳᐊᕐᕕᖓᓐᓂᑦ ᐃᒡᓗᒥᒡᓘᓐᓃᑦ ᐅᓪᓘᓪᓗ ᓇᑉᐸᖓᓂᑦ ᐅᓪᓗᓕᒫᕐᓘᓐᓃᑦ ᕿᓂᕋᔭᖅᑐᑦ ᓂᕈᐊᒐᒃᓴᓂᑦ
ᖃᓄᕐᓕ ᑕᒡᕙ ᐅᐸᙱᒃᑯᒪ ᓈᓚᒃᑎᓂᑦ ᓂᕈᐊᕋᓱᒃᑐᓂᑦ
ᑭᓇᓕᒫᖅ ᖃᐃᖁᔭᐅᔪᖅ ᓈᓚᒋᐊᖅᑐᖕᓂᖕᒧᑦ ᐅᐸᒋᐊᖃᖅᑐᖅ ᓈᓚᒃᑎᓂᑦ ᓂᕈᐊᕋᓱᒃᑎᓪᓗᒋᑦ ᐃᖅᑲᖅᑐᐃᕕᖕᒧᑦ ᐅᓪᓗᖓᓂᑦ ᓯᕿᙳᔭᖓᓂᒡᓗ ᐅᖃᖅᓯᒪᔪᒥᑦ ᖃᐃᖁᔨᔾᔪᑎᒥᑦ − ᑭᑭᑕᐅᓯᒪᙱᑉᐸᑕ ᐊᔪᖅᑎᑕᐅᒃᐸᑕᓘᓐᓃᑦ ᓯᕗᓂᐊᒍᑦ ᐸᓖᓯᙳᐊᒃᑯᑦ ᑎᑎᕋᕐᕕᐊᑎᓂᑦ. ᑭᓇᑐᐃᓐᓇᖅ ᐅᐸᙱᑦᑐᖅ ᐱᔾᔪᑎᖃᑦᑎᐊᙱᓪᓗᓂ ᑭᑭᑕᐅᓂᖕᒧᑦ ᐊᔪᖅᑎᑕᐅᓂᖕᒧᓪᓘᓐᓃᑦ ᖃᓄᐃᓕᔭᐅᑐᐃᓐᓇᕆᐊᓕᒃ ᐃᖅᑲᖅᑐᐃᕕᖕᒥᑦ.
ᓈᓚᒃᑎᓂᑦ ᓂᕈᐊᖕᓂᖅ ᐱᕋᔭᖕᓂᖕᒧᑦ ᐃᖅᑲᖅᑐᖅᑕᐅᔪᓄᑦ
ᐱᕋᔭᖕᓂᖕᒧᑦ ᐃᖅᑲᖅᑐᖅᑕᐅᓲᑦ ᒪᑯᓄᖓ ᑎᒡᓕᖕᓂᖕᒧᑦ, ᐸᒡᕕᓵᕆᓂᖕᒧᑦ, ᐋᓐᓂᖅᑎᕆᓂᖕᒧᑦ, ᖁᓄᔪᖕᓂᐊᖕᓂᖕᒧᑦ, ᐃᓄᐊᖅᓯᓂᖕᒧᑦ, ᑐᖂᖅᑎᓂᖕᒧᑦ, ᐱᒋᐊᖅᓯᓂᖕᒧ ᐃᑭᓕᖅᓯᓗᓂ, ᑎᒡᓕᖕᓂᖅ ᑮᓇᐅᔭᓕᖕᓂᑦ ᐊᔾᔨᒌᙱᑦᑑᑎᓄᑦ ᐋᖓᔮᖕᓇᖅᑐᓄᑦ. ᑖᒃᑯᐊ ᐱᕋᔭᖕᓃᑦ ᓇᓗᓇᖅᑕᐅᓯᒪᔪᖅ ᑲᓇᑕᒥ ᐱᕋᔭᖕᓂᕐᒧᑦ ᒪᓕᒐᐃᑦ.
ᐱᕋᔭᖕᓂᖕᒧᑦ ᐃᖅᑲᖅᑐᖅᑕᐅᔪᓄᑦ, ᐱᔾᔪᑕᐅᔪᖅ ᓈᓚᒃᑎᓂᑦ ᓂᕈᐊᖕᓂᖅ ᑖᒃᑯᐊ ᐃᖅᑲᖅᑐᐃᑎᑦᑎᔨᑦ ᐅᖃᐅᔾᔪᐃᒋᐊᖅᑎᖏᑦ (ᑕᐃᔭᑦᑕᐅᖅ ᐃᖅᑲᖅᑐᖅᑕᐅᑎᑦᑎᔨᑦ) ᓴᐳᔾᔨᓂᖕᒧᓪᓗ ᐅᖃᐅᔾᔪᐃᔨᑦ (ᒪᓕᒐᓕᕆᔨ ᐃᓄᖕᒧᑦ ᐃᖅᑲᖅᑐᒐᒃᓴᓕᐊᖑᔪᒧᑦ) ᖃᐅᔨᓇᓱᒡᓗᑎᒃ ᑭᒃᑯᓐᓂᑦ ᓈᓚᒃᑎᖃᕈᒪᖕᒪᖔᑕ.
12−ᓂᑦ 14−ᓄᑦ ᓈᓚᒃᑎᓂᑦ ᓂᕈᐊᖃᑦᑕᖅᑐᑦ ᐱᕋᔭᖕᓂᖕᒧᑦ ᐃᖅᑲᖅᑐᖅᑕᐅᔪᓄᑦ. ᐃᖅᑲᖅᑐᐃᑎᑦᑎᔨᑦ ᐅᖃᐅᔾᔪᐃᒋᐊᖅᑎᖏᑦ, ᓴᐳᔾᔨᓂᖕᒧᓪᓗ ᐅᖃᐅᔾᔪᐃᔨᑦ, ᐸᓯᔭᖅ (ᐃᓄᒃ ᐃᖅᑲᖅᑐᒐᒃᓴᓕᐊᖑᔪᖅ ᐱᕋᔭᖕᓂᖕᒥᓄᑦ) ᐃᖅᑲᖅᑐᐃᔨᓪᓗ ᐃᖅᑲᓇᐃᔭᖅᑎᖏᑦ ᑕᐃᑲᓃᑉᐸᒃᐳᑦ ᓈᓚᒃᑎᒃᓴᓂᑦ ᓂᕈᐊᕋᓱᓕᖅᑎᓪᓗᒋᑦ.
ᖃᓄᐃᓕᐅᒐᒃᓴᑦ:
- ᐃᖅᑲᖅᑐᐃᕕᐅᑉ ᑎᑎᕋᖅᑎᐊ ᐅᖃᓕᒫᖃᑦᑕᖅᐳᖅ ᐃᖅᑲᖅᑐᖅᑕᐅᔾᔪᑎᒃᓴᓂᑦ ᑖᓐᓇᓗ ᐸᓯᔭᐅᔪᖅ ᐊᐱᕆᔭᐅᕙᒃᖢᓂ ᐸᓯᔭᒃᓴᐅᙵᒫᑦ ᐸᓯᔭᒃᓴᐅᙱᒻᒪᖔᓪᓘᓐᓃᑦ − ᐸᓯᔭᖅ ᐸᓯᔭᒃᓴᐅᙱᓐᓂᕋᕈᓂ, ᓈᓚᒃᑎᓂᑦ ᓂᕈᐊᖕᓂᖅ ᐱᒋᐊᖃᑦᑕᖅᐳᖅ.
- ᐃᖅᑲᖅᑐᐃᕕᐅᑉ ᑎᑎᕋᖅᑎᐊ ᐊᒧᓯᓂᐊᖅᐳᖅ 12−ᓂᑦ ᓈᓚᒃᑎᒃᓴᑦ ᓇᓗᓇᐃᒃᑯᑕᖏᑦᑕ ᓇᐃᓴᐅᑎᖏᓐᓂᑦ ᑎᑎᕋᖅᑕᐅᓯᒪᔪᓂᑦ ᓈᓚᒃᑎᒃᓴᓂᑦ (ᓈᓚᒃᑎᐅᓂᕋᖅᑕᑦᑕᐅᖅ) ᐅᐸᒃᓯᒪᔪᓂᑦ.
- ᓈᓚᒃᑎᒃᓴᐃᑦ ᑭᐅᖃᑦᑕᖕᓂᐊᖅᐳᑦ "ᐅᕝᕙ"−ᓚᓗᑎᒃ ᓈᓚᒃᑎᐅᓂᖕᒧᑦ ᓇᓗᓇᐃᒃᑯᑕᖏᑦᑕ ᓇᐃᓴᐅᑎᖏᑦ ᑕᐃᔭᐅᒑᖓᑕ ᓵᑦᑎᐊᖓᓄᐊᖅᐸᒡᓗᑎᒡᓗ ᐃᖅᑲᖅᑐᐃᕕᐅᑉ.
- ᐃᖅᑲᖅᑐᐃᑎᑦᑎᔨ ᓴᐳᓐᓂᐊᕐᑎᓄᓪᓗ ᐅᖃᐅᔾᔪᐃᔨᑦ ᐊᖏᖃᑎᒌᖕᓂᐊᖅᐴᒃ ᐊᑭᓴᖅᑑᑎᓗᑎᒡᓘᓐᓃᑦ ᓈᓚᒃᑎᒃᓴᑦ ᐃᓚᐅᓂᐊᖕᓂᖏᓐᓂᑦ 12−ᓘᓐᓃᑦ 14−ᖑᖅᐸᑕᓘᓐᓃᑦ ᓂᕈᐊᖅᑕᑦ.
- ᑕᒡᕙᓕ ᑕᒪᑐᒪᓂ, ᐃᖅᑲᖅᑐᖅᑕᐅᔪᒃᓴᖅ ᑭᖑᕙᕆᐊᖅᑕᐅᕙᒃᐳᖅ (ᖃᖓᐅᒃᑲᓐᓂᖔᓕᖅᐸᑦ) ᑖᒃᑯᐊᓗ ᓈᓚᒃᑎᑦ ᐊᓂᑎᑕᐅᓪᓗᑎᒃ ᐃᖅᑲᖅᑐᐃᕕᖕᒥᑦ. ᐃᓛᓐᓂᒃᑯᓱᖔᓗᒃ, ᐃᖅᑲᖅᑐᐃᓯᑲᐅᑎᒋᓲᑦ.
ᑭᖑᕝᕕᖅᑎᒃᓴᑦ ᓈᓚᒃᑎᑦ: ᐃᖅᑲᖅᑐᐃᔨ ᒪᕐᕉᖕᓂᒃ ᑭᖑᕝᕕᐅᑎᔪᒃᓴᓂᑦ ᓂᕈᐊᖅᓯᔪᓐᓇᖅᐳᖅ ᓈᓚᒃᑎᒃᓴᓂᑦ.
ᑭᖑᕝᕕᐅᑎᔪᒃᓴᐃᑦ ᓈᓚᒃᑎᑦ ᐃᓚᐅᔭᕆᐊᖃᖅᐳᑦ ᐅᓪᓗᖓᓂᑦ ᓯᕗᓪᓕᖅᐹᒥᑦ ᐃᖅᑲᖅᑐᐃᓕᖅᑎᓪᓗᒋᑦ. ᑎᓕᐅᖅᑕᐅᓯᒪᓗᑎᒃ ᐃᖅᑲᖅᑐᐃᕕᖕᒧᑦ ᑖᒃᑯᐊ ᐃᓚᖓᑦ ᓈᓚᒃᑎᑦ ᓈᓚᒃᑎᐅᔪᓐᓇᙱᑉᐸᑦ, ᑭᖑᕝᕕᐅᑎᔪᒃᓴᖅ ᓈᓚᒃᑎᑦ ᐃᓇᖐᓂᐊᖅᐳᖅ ᓈᓚᒃᑎᐅᓕᕐᓗᓂ.
ᓈᓚᒃᑎᓂᑦ ᓂᕈᐊᖕᓂᖅ ᐃᓅᖃᑎᒥᓂᒃ ᐃᖅᑲᖅᑐᖅᑕᐅᑎᑦᑎᔪᓄᑦ
ᓈᓚᒃᑎᓂᑦ ᓂᕈᐊᖕᓂᖅ ᐃᓅᑎᒌᓄᑦ ᐃᖅᑲᖅᑐᖅᑕᐅᑎᑦᑎᔪᓄᑦ ᐊᔾᔨᐸᓗᒋᕙᐅᒃ ᐱᕋᔭᖕᓂᖕᒧᑦ ᐃᖅᑲᖅᑐᖅᑕᐅᔪᓄᑦ. ᐊᔾᔨᒌᙱᓐᓂᐅᕌᕐᔪᒃᑐᑦ ᐅᑯᐊ:
- ᐃᖅᑲᖅᑐᖅᑕᐅᑎᑦᑎᔪᑦ ᓴᐳᑎᓯᒪᔪᓪᓗ: ᐃᓅᖃᑎᒌᓄᑦ ᐃᖅᑲᖅᑐᖅᑕᐅᑎᑦᑎᓃᑦ ᐋᖅᑭᒋᐊᕈᑕᐅᕙᒃᐳᑦ ᑖᒃᑯᖕᓇᙵᒃ ᐃᖅᑲᖅᑐᖅᑕᐅᑎᑦᑎᔪᒧᑦ (ᑖᒃᑯᐊ ᐱᒋᐊᖅᑎᑦᑎᔪᑦ) ᓴᐳᑎᓯᒪᔪᕐᓗ (ᐊᑭᓴᖅᑐᐃᔪᖅ ᐱᒋᐊᖅᑕᒧᑦ) − ᑕᒪᖕᒥᒃ ᓴᖅᑭᑕᐅᕙᒃᐴᒃ ᓈᓚᒃᑎᓂᑦ ᓂᕈᐊᓕᖅᑎᓪᓗᒋᑦ
- ᐊᒥᓲᓂᖏᑦ ᓈᓚᒃᑏᑦ: 8−ᑐᐊᓂᒃ ᓈᓚᒃᑎᓂᑦ ᐃᓅᖃᑎᒌᓄᑦ ᐃᖅᑲᖅᑐᐃᑎᑦᑎᔪᐃᑦ ᓂᕈᐊᖃᑦᑕᖅᐳᑦ.
- ᖃᖓᐅᓕᕌᖓᑦ: ᐃᓅᖃᑎᒌᒥᑦ ᐃᖅᑲᖅᑐᐃᑎᑦᑎᓃᑦ ᐱᒋᐊᖃᑦᑕᖅᐳᑦ ᐅᓪᓗᔅᓴᐃᓐᓇᖓᓂᑦ ᓈᓚᒃᑎᑦ ᓂᕈᐊᖅᑕᐅᓚᐅᖅᑎᓪᓗᒋᑦ − ᖃᐃᖁᔭᐅᓯᒪᒍᕕᑦ ᐃᓅᖃᑎᒌᓄᑦ ᐃᖅᑲᖅᑐᐃᔪᓄᑦ, ᐅᐸᓗᖓᐃᖅᓯᒪᓂᐊᕐᐳᑎᑦ ᐅᓪᓗᓕᒫᖅ ᐃᖅᑲᖅᑐᐃᕕᖕᒦᓐᓂᐊᕐᓗᑎᑦ
ᓂᕈᐊᖅᑕᐅᒍᕕᑦ ᓈᓚᒃᑎᐅᓂᖕᒧᑦ
ᑭᓇᑐᐃᓐᓇᖅ ᓂᕈᐊᖅᑕᐅᔪᖅ ᓈᓚᒃᑎᐅᓂᖕᒧᑦ ᐃᖅᑲᖅᑐᖅᑕᐅᔪᒧᑦ ᐊᖏᖅᑎᑕᐅᓂᐊᖅᐳᖅ ᓇᓗᓇᐃᕐᓯᑎᑕᐅᓗᓂᓘᓐᓃᑦ ᐃᖏᑎᑕᐅᓕᕐᓗᓂᓗ ᓈᓚᒃᑎᑦ ᐃᓂᖏᓐᓄᑦ.
ᓂᕈᐊᖅᑕᐅᙱᒃᑯᕕᑦ ᓈᓚᒃᑎᐅᓂᖕᒧᑦ
ᐃᓛᒃᑰᖓᔪᒥᑦ ᓂᕈᐊᖕᓂᖃᕋᔭᖅᐳᑦ ᐃᖅᑲᖅᑐᖅᑕᐅᔪᓄᑦ ᓈᓚᒃᑎᓕᖕᓂᑦ ᐊᒥᓱᒐᓚᐃᓪᓗ ᓈᓚᒃᑏᑦ ᓂᕈᐊᖅᑕᐅᑐᐃᓐᓇᕆᐊᖃᖅᖢᑎᒃ ᐅᓪᓗᖕᒥᑦ ᐊᑕᐅᓯᖕᒥᑦ. ᐅᓪᓗᖓᓂᑦ ᓂᕈᐊᖅᑎᓪᓗᒋᑦ ᓈᓚᒃᑎᓂᑦ, ᑭᓇᑐᐃᓐᓇᖅ ᓂᕈᐊᖅᑕᐅᙱᑦᑐᖅ ᑕᐃᒫᖅᑕᐅᕗᖅ. ᑭᓯᐊᓂᓕ, ᐅᑎᖁᔭᐅᒃᑲᓐᓂᑐᐃᓐᓇᕆᐊᖃᖅᐳᑎᑦ ᐅᓪᓗᖓᓂᑦ ᓂᕈᐊᒃᑲᓐᓂᖅᑐᖃᕆᐊᖃᓕᖅᐸᑦ. ᑕᐃᒪᐃᒃᑯᕕᑦ, ᐃᖅᑲᖅᑐᐃᔨᐅᑉ ᖃᐅᔨᑎᓐᓂᐊᖅᐹᑎᑦ ᐊᓂᓚᐅᙱᓐᓂᖕᓂᑦ ᐃᖅᑲᖅᑐᐃᕕᖕᒥᑦ. ᐃᓛᓐᓂᒃᑯᓚᐅᓱᖔᓗᒃ, ᐃᖅᑲᖅᑐᐃᔨ ᑎᓕᓯᑐᐃᓐᓇᕆᐊᖃᖅᐳᖅ ᐸᓖᓯᙳᐊᒥᑦ ᖃᐅᔨᒋᐊᕐᕕᒋᖁᓗᓂᒋᑦ ᓈᓚᒃᑎᒃᓴᑦ ᖃᖓᐅᒃᑲᓐᓂᓕᖅᐸᑦ ᐅᐸᖕᓂᐊᕐᓗᑎᒃ ᓂᕈᐊᒃᑲᓐᓂᕋᓱᒃᑐᓄᑦ