ᑭᐅᓂᖅ ᓈᓚᒃᑎᐅᓂᖕᒧᑦ ᖃᐃᖁᔭᐅᓂᖕᒧᑦ

ᓈᓚᒃᑎᐅᓂᖕᒧᑦ ᖃᐃᖁᔭᐅᓂᑦ ᑎᓕᐅᕆᓂᐅᕗᖅ ᐃᖅᑲᖅᑐᐃᕕᓕᐊᖁᔭᐅᓂᖕᒥᑦ, ᐅᐸᒃᑕᐅᓗᑎᑦ ᑎᑎᖅᑲᑎᒍᓪᓘᓐᓃᑦ, ᑭᓇᓕᒫᒧᑦ ᓂᕈᐊᖅᑕᔪᖅ ᐊᑎᖕᓂᑦ ᓇᓗᓇᐃᕐᓯᓯᒪᔪᖅ ᐃᓄᒃ ᐃᖅᑲᖅᑐᐃᕕᓕᐊᕆᐊᖃᖕᓂᖓᓂᑦ ᐅᓪᓗᖓᓂᑦ, ᓯᕿᙳᔭᖓᓂᒡᓗ ᓇᒥᓪᓗ ᓇᓗᓇᐃᕐᓯᒪᔭᖓᓂᑦ.

ᐱᒍᕕᑦ ᓈᓚᖕᓂᖕᒧᑦ ᖃᐃᖁᔭᐅᓗᑎᑦ ᓂᕈᐊᖅᑕᐅᙱᓚᑎᑦ ᓈᓚᒃᑎᐅᖁᔭᐅᓗᑎᑦ.  ᑭᖑᓂᐊᒍ ᓈᓚᒃᑎᓂᑦ ᓂᕈᐊᖅᑐᓄᙵᐅᓗᑎᑦ ᖃᐅᔨᓇᓱᒡᓗᑎᒃ ᐃᓄᖕᓂᑦ ᓂᕈᐊᖅᑕᓂᑦ ᓈᓚᒃᑎᐅᓂᐊᖅᑐᓂᑦ ᐃᖅᑲᖅᑐᐃᔪᓂᑦ.

ᐃᖅᑲᖅᑐᐃᕕᖕᒧᑦ ᖃᐃᖁᔭᐅᒍᕕᑦ, ᒪᓕᒐᑎᒍᑦ ᐅᐸᒋᐊᖃᖅᐳᑎᑦ

ᖃᐃᖁᔭᐅᔾᔪᑏᑦ ᓇᓗᓇᐃᕐᓯᓯᒪᓂᐊᖅᑐᖅ ᐱᕋᔭᖕᓂᖕᒨᖓᖕᒪᖔᑦ ᐃᓅᖃᑎᒌᓅᖕᒪᖔᑦ/ᓇᖕᒥᓂᖃᖅᑐᓅᖓᖕᒪᖔᓪᓘᓐᓃᑦ.

ᒪᕐᕈᐃᓕᖓᔪᒃᑯᑦ ᑭᐅᔪᓐᓇᖅᐳᑎᑦ ᖃᐃᖁᔭᐅᒍᕕᑦ:

• ᖃᕆᓴᐅᔭᒃᑯᑦ: ᐊᑐᕐᓗᑎᑦ ᐃᖅᑲᖅᑐᐃᕕᒃᑯᑦ ᐱᔨᑦᑎᕋᕐᕕᐊᑕ ᐃᑭᐊᖅᑭᕕᖓᒍᑦ ᑭᐅᕝᕕᐅᓲᑦ − ᐊᑐᕆᐊᖃᖕᓂᐊᖅᑕᐃᑦ ᓈᓚᒃᑎᐅᓂᖕᒧᑦ ᖃᐃᖁᔭᐅᓯᒪᔾᔪᑏᑦ ᑭᐅᖃᑦᑕᖕᓂᐊᕐᓗᑎᑦ ᖃᕆᑕᐅᔭᒃᑯᑦ.

• ᑎᑎᖅᑲᓂᐊᕐᕕᒃᑯᑦ: ᑎᑎᕋᕐᕕᒋᓗᒍ ᓈᒪᒃᑎᐅᓂᖕᒧᑦ ᓇᓗᓇᐃᒃᑯᑖᑕ ᑎᑎᕋᕐᕕᒃᓴᖓᓂᑦ ᐃᓚᓕᐅᑎᓯᒪᔪᖅ ᓈᓚᒃᑎᐅᓂᖕᒧᑦ ᖃᐃᖁᔨᐅᔾᔪᑎᖕᓂᑦ ᐊᐅᓪᓚᖅᑎᓪᓗᒍᓗ ᐴᒃᓴᒥᑦ ᐃᓗᐊᓃᑦᑐᒥᑦ.

ᐊᔪᖅᑎᑕᐅᕕᑦ ᑭᑭᑕᐅᓯᒪᕕᓪᓘᓐᓃᑦ ᓈᓚᒃᑎᐅᓂᖕᒧᑦ?

ᓈᓚᒃᑎᐅᓂᖕᒧᑦ ᐱᖁᔭᖓ ᐃᓚᖏᓐᓂᑦ ᐃᓄᖕᓂᑦ ᐊᔪᖅᑎᑦᑎᖃᑦᑕᖅᐳᑦ ᓈᓚᒃᑎᐅᓂᖕᒥᑦ.

ᐃᓄᖕᓂᑦᑕᐅᖅ ᑐᒃᓯᕋᕈᓐᓇᖅᑎᑦᑎᖕᒥᔪᑦ ᑭᑭᑕᐅᔪᒪᒍᑎᒃ ᓈᓚᒃᑎᐅᓂᖕᒥᑦ, ᒪᓕᒡᓗᓂ ᖃᓄᐃᓕᖓᓪᓚᕆᖕᓂᖓᓂᑦ.

ᑭᐅᒍᕕᑦ ᖃᐃᖁᔭᐅᓂᖕᒧᑦ, ᑭᑭᑕᐅᔪᒪᔪᓐᓇᖅᐳᑎᑦ ᐊᔪᕐᓂᕋᕐᓗᑎᓪᓘᓐᓃᑦ ᐃᓱᒪᒍᕕᑦ ᒪᓕᙱᓐᓇᕕᑦ ᐊᑐᕐᑕᐅᔪᓂᑦ.

ᑭᑭᑕᐅᔪᒪᒍᕕᑦ ᐊᔪᖅᑎᑕᐅᔪᒪᒍᕕᓪᓘᓐᓃᑦ, ᑕᐃᒪᐃᙱᑐᐃᓐᓇᕆᐊᓕᒃ. ᓄᓇᕗᒻᒥᑦ ᐃᖅᑲᖅᑐᐃᕕᐅᑉ ᐸᓖᓯᙳᐊᖓᑕ ᑎᑎᕋᕐᕕᐊ, ᐊᐅᓚᑦᑎᓲᖅ ᓈᓚᒃᑎᓕᕆᓂᖕᓂᑦ ᓄᓇᕗᒻᒥᑦ, ᕿᒥᕐᕈᓂᐊᖅᑐᖅ ᑐᒃᓯᕋᖅᑕᖕᓂᑦ ᐃᓱᒪᒃᓴᖅᓯᐅᕈᑎᒋᓗᓂᐅᒡᓗ.

ᑭᑭᑕᐅᒍᕕᑦ ᐊᔪᖅᑎᑕᐅᒍᕕᓪᓘᓐᓃᑦ, ᓈᓚᒃᑎᐅᔭᕆᐊᖃᙱᓚᑎᑦ ᐅᐸᒋᐊᖃᙱᓪᓗᑎᒡᓗ ᓈᓚᒃᑎᓂᑦ ᓂᕈᐊᓕᖅᐸᑕ.

ᑭᒃᑯᑦ ᐊᔪᖅᑎᑕᐅᕙᖕᒪᑕ:

ᐆᒃᑑᑎᑦ ᐃᓄᖕᓂᑦ ᐊᔪᖅᑎᑕᐅᔪᑦ ᐅᑯᐊ:

• ᑭᓇᑐᐃᓐᓇᖅ ᑲᓇᑕᒥᐅᑕᐅᙱᑦᑐᖅ
• ᑐᖔᓂᑦ 18 ᐅᑭᐅᓖᑦ
• ᑕᐃᒃᑯᐊ ᐱᕋᔭᒃᑐᕕᓂᐅᓯᒪᓪᓗᑎᒃ ᑎᒍᔭᐅᒪᔭᕆᐊᖃᖅᖢᑎᒡᓗ ᐊᕐᕌᒍᒧᑦ ᐊᑕᐅᓯᖕᒧᑦ ᐅᖓᑖᓄᓪᓘᓐᓃᑦ
• ᑭᒃᑯᑐᐃᓐᓇᐃᑦ ᐅᖃᓪᓚᒍᓐᓇᙱᑦᑐᑦ ᑐᑭᓯᐊᓇᑎᒡᓗ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᖕᓂᑦ ᓄᓇᕗᒻᒥᑦ

ᑭᑭᑕᐅᕙᒃᑐᑦ:

ᐃᖅᑲᖅᑐᐃᕕᖕᒥ ᐸᓖᓯᐅᑉ ᐊᒡᓚᒡᕕᖓ ᑭᑭᑦᑎᔪᓐᓇᖅᐳᖅ ᐅᑯᓄᖓ ᐱᔾᔪᑎᖃᕐᓗᓂ:

• ᐃᓚᒋᔭᑦ ᑯᐃᓐᒥᑦ ᐅᖃᐅᔾᔪᐃᔩᑦ ᑲᑎᒪᔨᖏᓐᓄᑦ ᑲᓇᑕᒥᓪᓘᓐᓃᑦ ᐃᑦᑐᑯᕕᖕᒥᓪᓘᓐᓃᑦ ᒪᓕᒐᓕᐅᕐᕕᒡᔪᐊᒥᓪᓘᓐᓃᑦ ᑲᓇᑕᒥᑦ;
• ᑲᒥᓯᓇ ᐊᒻᒪ ᒪᓕᒐᓕᐅᖅᑎᐅᖃᑕᐅᔪᑦ;
• ᑲᓇᑕᒥᐅᑦ ᐸᓖᓯᒃᑯᑦ;
• ᐃᖅᑲᑐᐃᔨᑦ ᓇᓕᐊᖕᓂᑐᐃᓐᓇᖅ ᐱᕙᓪᓕᐊᔭᐅᔪᑦ ᑎᑎᕋᖅᐸᓪᓕᐊᔪᓂ, ᐃᖅᑲᖅᑐᐃᔨᕋᓛᑦ ᐊᒻᒪ ᑐᖁᖓᔪᓕᕆᔨᑦ;
• ᒪᓕᒐᓕᕆᔨ ᐃᑲᔪᖅᑎ ᐊᒻᒪ ᓄᓇᓕᖕᓂ ᒪᓕᒐᓕᕆᔨᒻᒪᕆᒃ;
• ᑐᒃᓯᐊᕐᕕᖕᓄᑦ ᐃᓚᒋᔭᐅᔪᑦ ᓇᓕᐊᖕᓂᑐᐃᓐᓇᖅ ᑐᒃᓯᐊᕐᕕᖕᒥ;
• ᑮᓇᐅᔾᔭᒃᓴᔪᑦ ᖃᑦᑎᕆᔩᑦ ᐊᒻᒪ ᐃᓚᒋᔭᐅᖃᑦᑕᖅᑐᑦ ᖃᑦᑎᕆᔭᓪᓚᑦᑖᓄᑦ ᓄᓇᓕᖕᓂ;
• ᐃᖅᑲᖅᑐᐃᕕᖕᒥ ᐃᖅᑲᓇᐃᔭᖅᑎ, ᐅᑯᐊᓗ ᐸᓖᓯᑦ, ᐸᓖᓯᒃᓴᐃᑦ ᐊᒻᒪ ᐃᖅᑲᖅᑐᐃᕕᖕᒥ ᐱᔨᑦᑎᕋᖅᑎᑦ;
• ᐃᖅᑲᓇᐃᔭᖅᑏᑦ ᑎᓕᔭᐅᔪᑦ ᓄᓇᓖᑦ ᒪᓕᒐᕋᓛᖏᓐᓂᒃ ᐊᑐᓕᖅᑎᑦᑎᖁᔭᐅᓪᓗᑎᒃ;
• ᐃᖅᑲᓇᐃᔭᖅᑏᑦ ᐊᒻᒪ ᐃᓚᒋᔭᐅᔪᑦ ᑲᓇᑕᒥ ᐅᓇᑕᖅᑐᒃᓴᓂᑦ;
• ᓘᒃᑖᑦ, ᐱᓚᒃᑐᐃᔨᑦ, ᑭᒍᑎᓕᕆᔨᑦ ᐊᒻᒪ ᐄᔭᒐᖅᑖᕐᕕᓕᕆᔨ ᐱᓕᕆᖃᑦᑕᖅᑐᓂᑦ;
• ᐋᓐᓂᐊᓯᐅᑏᑦ ᐱᓕᕆᖃᑦᑕᖅᑐᑦ;
• ᐃᓄᐃᑦ ᐱᓕᕆᐊᒃᓴᖃᖅᑐᑦ ᑎᒍᔭᐅᓯᒪᔪᓂᑦ ᐊᒻᒪ ᐊᓐᓄᓪᓚᒃᓰᕕᖕᒦᑦᑐᓂᑦ;
• ᒪᓕᒐᓕᕆᔨᒃᑯᓐᓂ ᐃᖅᑲᓇᐃᔭᖅᑐᑦ ᓄᓇᕗᑦ ᒐᕙᒪᖓᓂ;
• ᒪᓕᒐᓕᕆᔨᒃᑯᓐᓂ ᐃᖅᑲᓇᐃᔭᖅᑐᑦ ᑲᓇᑕᐅᑉ ᒐᕙᒪᖓᓂ.

ᓴᓂᕐᕙᐃᓃᑦ:

ᐃᖅᑲᖅᑐᐃᕕᖕᒥ ᐸᓖᓯᐅᑉ ᐊᒡᓚᒡᕕᖓ ᓄᖅᑲᖅᑎᑦᑎᔪᓐᓇᖅᐳᖅ ᐅᑯᓄᖓ ᐱᔾᔪᑎᖃᕐᓗᓂ:

• ᐋᓐᓂᐊᕈᑎᖃᕈᕕᑦ ᐊᔪᕈᑕᐅᓂᐊᖅᑐᒥᑦ ᓈᓚᒃᑎᐅᓂᖕᒥᑦ
• ᐊᐅᓪᓚᕆᐊᖃᕈᕕᑦ ᐋᓐᓂᐊᕕᖕᒧᑦ ᒪᓕᒃᑎᐅᓗᑎᓪᓘᓐᓃᑦ
• ᐊᒃᓱᕈᓕᑳᓪᓚᒐᔭᕈᕕᑦ
• ᐊᐅᓪᓚᓪᓚᕆᓛᕈᕕᑦ ᕿᑲᓛᖕᓂᖕᓄᓪᓘᓐᓃᑦ ᑐᓗᒃᑕᕈᑎᔪᑦ ᓈᓚᒃᑎᓂᑦ ᓂᕈᐊᖕᓇᖓᓂᑦ ᐃᖅᑲᖅᑐᐃᓐᓇᐅᓪᓘᓐᓃᑦ ᐅᓪᓗᖏᓐᓂᑦ

ᓇᓗᓇᐃᔭᑦᑎᐊᖅᓯᒪᔪᓂᑦ ᑐᑭᓯᒋᐊᒃᑲᓐᓂᕈᒪᒍᕕᑦ ᑭᑭᑕᐅᔪᓂᑦ ᐊᔪᖅᑎᑕᐅᔪᓂᒡᓘᓐᓃᑦ, ᕿᒥᕐᕈᓗᒍ ᐃᓚᓕᐅᑎᓯᒪᔪᑦ ᓈᓚᖕᓂᖕᒧᑦ ᖃᐃᖁᔭᐅᓯᒪᔾᔪᑎᖕᓂᑦ.

ᑭᑭᑕᐅᔪᒪᓂᖅ ᓈᓚᒃᑎᐅᓂᖕᒧᑦ

ᑭᑭᑕᐅᔪᒪᔪᑦ ᑐᒃᓯᕋᕆᐊᓖᑦ ᓈᓚᒃᑎᓂᑦ ᓂᕈᐊᓚᐅᙱᑎᓪᓗᒋᑦ, ᐊᑐᕐᓗᑎᒃ ᓇᓕᐊᓐᓂᒃ ᐅᓇᓂ:

• ᖃᕆᓴᐅᔭᒃᑯᑦ: ᐊᑐᕐᓗᑎᑦ ᐃᖅᑲᖅᑐᐃᕕᒃᑯᑦ ᐱᔨᑦᑎᕋᕐᕕᐊᑕ ᐃᑭᐊᖅᑭᕕᖓᒍᑦ ᑭᐅᕝᕕᐊᓂᑦ. ᐊᑐᕆᐊᖃᖕᓂᐊᖅᑕᐃᑦ ᓈᓚᒃᑎᐅᓂᖕᒧᑦ ᖃᐃᖁᔭᐅᓯᒪᔾᔪᑏᑦ ᑭᐅᖃᑦᑕᖕᓂᐊᕐᓗᑎᑦ ᖃᕆᑕᐅᔭᒃᑯᑦ.  ᑐᒃᓯᕋᖕᓂᐊᖅᐳᑎᑦ ᐃᕐᖐᓐᓇᒃᑰᕈᑎᒃᑯᑦ ᑭᐅᔭᐅᔪᒪᓗᑎᒃ ᑭᑭᑕᐅᔪᒪᓂᖕᒧᑦ ᑐᒃᓯᕋᐅᑏᑦ ᐱᓕᕆᐊᖑᐊᓂᒃᐸᑦ.
• ᑎᑎᖅᑲᓂᐊᕐᕕᒃᑯᑦ: ᑎᑎᕋᕐᕕᒋᓗᒍ ᓈᒪᒃᑎᐅᓂᖕᒧᑦ ᓇᓗᓇᐃᒃᑯᑖᑕ ᑎᑎᕋᕐᕕᒃᓴᖓᓂᑦ ᐃᓚᓕᐅᑎᓯᒪᔪᖅ ᓈᓚᒃᑎᐅᓂᖕᒧᑦ ᖃᐃᖁᔨᐅᔾᔪᑎᖕᓂᑦ ᐊᐅᓪᓚᖅᑎᓪᓗᒍᓗ ᐴᒃᓴᒥᑦ ᐃᓗᐊᓃᑦᑐᒥᑦ.

ᑭᑭᑕᐅᓂᖕᒧᑦ ᐊᖏᖅᑕᐅᒍᕕᑦ ᖃᐅᔨᓇᔭᖅᐳᑎᑦ:

ᑎᑎᖅᑲᒃᑯᕕᒃᑎᒍᑦ ᑭᐅᓚᐅᕈᕕᑦ, ᐸᓖᓯᙳᐊᖅ ᐃᓕᖕᓂᑦ ᑐᓴᕋᓱᖕᓂᐊᖅᐳᖅ ᐅᓪᓗᑦ ᖁᓕᑦ ᐃᖅᑲᓇᐃᔭᖕᓇᑦ ᐅᓪᓗᖏᓐᓄᑦ ᐅᓪᓗᖓᓂᑦ ᑐᒃᓯᕋᐅᑏᑦ ᑭᑭᑕᐅᔪᒪᓂᖕᒧᑦ ᐱᔭᐅᒃᐸᑦ. ᑭᐅᔭᐅᓚᐅᙱᒃᑯᕕᑦ ᑭᑭᑕᐅᔪᒪᓂᖕᒧᑦ, ᐅᐸᒋᐊᖃᖅᐳᑎᑦ ᓈᓚᒃᑎᒃᓴᓂᑦ ᓂᕈᐊᓕᖅᐸᑕ ᐅᓪᓗᖓᓂᑦ ᓯᕿᙳᔭᖓᓐᓂᒡᓗ ᑎᑎᕐᓯᒪᔭᖓᓂᑦ ᖃᐃᖁᔭᐅᓂᖕᓄᑦ.

ᑭᐅᓚᐅᕈᕕᑦ ᖃᐃᖁᔭᐅᔾᔪᑎᒧᑦ ᐃᑭᐊᖅᑭᕕᒃᑯᑦ, ᖃᐅᔨᒋᐊᕈᓐᓇᖅᐳᑎᑦ ᖃᖓᑐᐃᓐᓇᖅ ᑕᑯᓇᒡᓗᒍᓗ ᑐᒃᓯᕋᐅᑏᑦ ᐊᑖᓂ "ᐱᖁᑎᒃᑲ"-ᓚᓯᒪᔪᒥᑦ